CCCLXXXI.

1497, September 22. Kamenz.

Abt Jacob überweist Johann Kämnitz ein dem Stifte gehöriges Haus in Neisse auf Lebenszeit.

Wir bruder Jacobus von den gnoden gotis abt des closters Kamencz bekennen offentlichen mit diesem briefe allen und itczlichen, die en sehen ader horen lesen, des wir mit rate und willen unserer eldisten bruder und der gantczen samlunge unsers closters unser haws zur Neisze bey dem Monsterbergischen thor gelegen, zugesaget haben und zusagen mit crafft dieses briefes dem vorsichtigen Johann Kaemnitz, em zu seinen lebetagen dorynne zu wonen, zu handeln und zu orbern, also das her is vorgehen und vorstehn sal ken der stat mit geschassern und mit anslegen und was die stat zu rechte hot etc. Auch sal her geben eyne margk zinse eynem prister eynes altaris halben alle ior iaerlich und sal das gebewde halden yn wirden in dem gantczen hofe von seynen gelde. Und so her icht newes bawen welde em zu gute, das sal her mit unserm rate thuen. Und wie her sich weiter ken uns haben unde halden sal, das findet man in den awsgesneten czedeln, die wir kegen enander haben. Czu groszer bestetigunge sulcher unser zusage haben wir unser segil der eptey an diesen brieff lossen hengen, der do geben ist yn unserm closter Kamencz noch Cristi gebort tausend firhundert dornoch yn dem seben und newnczigisten iore an sante Mauricientage und seyner gesellen.

Or. Perg. Das leidlich erhaltene S. des Abts an einem Pergamentstreifen.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.